dinsdag 3 januari 2012

Dinsdag Dicht (39)

Störm

In wilde voart
Mit graauwe board
Komt de störm
Oet zien hörn.

d’ Onbedwongen
Volle longen
Barsten open
Onder ’t loopen.

Wild en enter
Over twenter
Veegde ’t laand,
Bezzem in haand

Brolt en dundert,
Rolt en klundert
Mit zien broezen
Rond de hoezen.

Gaait aan speulen
Mit ’n meulen.
Rouen draaien
Van zien swaaien.

Vogels strieden,
Wolken glieden
Op zien vlocht
Deur de locht.

Golven springen
Onder ’t dwingen
Van zien macht
Oet de gracht.

En het luden
Van zien ruden
Slagt de kimmen
Mit zien stemmen.



Derk Sibolt Hovinga
Störm en Stilte